Տպել
Նորություններ
ՄԱՅԻՍԻ 3-ԻՑ 10-Ը՝ ՀԱՄԱՅՆՔԱՅԻՆ ՇԱԲԱԹՕՐՅԱԿՆԵՐ
05.05.2014
Գեղարքունիքի մարզի համայնքներում մայիսի 3-ից ընթանում են աղբահանության, սանիտարական մաքրման, ծառատնկման, ներհամայնքային նշանակության ճանապարհների բարեկարգման աշխատանքներ: Շաբաթօրյակն իրականացվում է Գեղարքունիքի մարզպետի 2014 թվականի ապրիլի 28-ի որոշման համաձայն: Ըստ իրավական փաստաթղթի՝ հանձնարարականի կատարմանը ներգրավված են համայնքների բնակիչներ, համայնքների տարածքներում գործող կազմակերպությունների և տնտեսվարող սուբյեկտների ներկայացուցիչներ, մարզային ենթակայության հանրակրթական ուսումնական հաստատությունների մանկավարժական կոլեկտիվներ, բարձր դասարանների աշակերտներ, մարզային ենթակայության առողջապահական ընկերությունների աշխատակիցներ, մարզի տարածքում պետական նշանակության ավտոմոբիլային ճանապարհները սպասարկող կազմակերպություններ և այլոք: Մայիսի 5-ի տվյալներով համայնքների զգալի մասում շաբաթօրյակն ավարտվել է: Իրականացվել են դպրոցների, բուժհիմնարկների, մանկապարտեզների տարածքների, համայնքային նշանակության ճանապարհների, մայթեզրերի մաքրման աշխատանքներ: Մարտունու, Վարդենիսի Գավառի տարածքներում համայնքների բնակչության միջոցով մաքրվել են գետեզրերն ու առուները, բարեկարգվել են քաղաքային գազոնները, մայթեզրերը, որոշ տարածքներում նաև անտառապատ հատվածները: Մեծ Մասրիկ համայնքում բնակիչների մասնակցությամբ մաքրվել է նաև համայնքի գերեզմանոցը: Գավառ, Վարդենիս, Մարտունի, Սևան, Ճամբարակ քաղաքային, Գանձակ, Վարդենիկ, Կախակն, Նորատուս, Ձորագյուղ,Վարսեր, Լճաշեն, Զովաբեր և մի քանի այլ գյուղական համայնքներում իրականացվել են ծառատնկման, իսկ մնացած համայնքներում ծառաթփերի, այլ սերմերի տնկման աշխատանքներ, որոնց ապահովելու խնդրի լուծումը դրված է մարզպետարանի աշխատակազմի գյուղատնտեսության եւ բնապահպանության վարչության վրա: Մարզպետ Ռաֆիկ Գրիգորյանի որոշմամբ մարզպետարանի ստորաբաժանումների աշխատակիցները ամրացված են համայնքներին և վերահսկում են շաբաթօրյակների ընթացքը: Որոշման համաձայն մարզի բոլոր համայնքերում սանիտարական աշխատանքների կատարման հսկողությունը վերապահված է մարզպետի տեղակալ Անդրանիկ Հակոբյանին և աշխատակազմի ղեկավար Սևակ Խլղաթյանին: Ըստ նախատեսվածի մարզի համայնքներում շաբաթօրյակները կշարունակվեն մինչև մայիսի 10-ը: