Գեղարքունիքի մարզպետի աշխատակազմ

Գեղարքունիքի մարզպետի 2014 թվականի մարտի 31-ի որոշմամբ մարզում ստեղծվել է մարզպետին առընթեր երիտասարդական խորհուրդ, որը բխում է Հայաստանի Հանրապետության վարչապետի 2014 թվականի փետրվարի 10-ի հանձնարարականից:  Մարզպետին առընթեր երիտասարդական խորհուրդը ունի կանոնադրություն, որը ստեղծվել է երիտասարդական խորհրդի օրինակելի կանոնադրության հիման վրա: Ըստ կանոնադրության՝ խորհուրդը  բաղկացած է 46 հոգուց, որի կազմում ներառված են համայնքների ղեկավարների տեղակալներ, երիտասարդներին առնչվող կրթական, սոցիալական, առողջապահական, զբաղվածության և մշակութային խնդիրներին տիրապետելու ունակություն ունեցող պետական և մասնավոր կառույցներից ընտրված 16-30 տարեկան անձինք: Խորհրդի անդամները մարզի համայնքներից ընտրվել են   հրավիրված ավագանու նիստերի ընթացքում: Ապրիլի 17-ին Գեղարքունիքի մարզպետ Ռաֆիկ Գրիգորյանը մարզպետարանում անցկացրեց մարզպետին առընթեր երիտասարդական խորհրդի անդրանիկ նիստը, որի ընթացքում հրապարակվեց խորհրդի կազմը: Կանոնադրության համաձայն  խորհրդի նախագահը  մարզպետն է: Մարզպետի հանձնարարությամբ խորհրդի գործունեությունը համակարգվում է մարզպետարանի աշխատակազմի կրթության, մշակույթի, սպորտի վարչության կողմից:   Գեղարքունիքի մարզպետին առընթեր երիտասարդական խորհրդի անդամները բաց քվեարկությամբ ընտրեցին խորհրդի քարտուղար:    Նիստի ընթացքում խորհրդի նախագահը  խոսեց  խորհրդի գործունեության նպատակների և խնդիրների մասին: Ըստ զեկուցման խորհրդի     նպատակն է համայնքներում երիտասարդական քաղաքականության մշակմանն ու իրականացմանն աջակցելը և խթանելը, հանրային կյանքի տարբեր բնագավառներում երիտասարդների մասնակցության համար բարենպաստ մթնոլորտի ձևավորումը, երիտասարդական կազմակերպությունների գործունեության ընդլայնման և խրախուսման նպատակով տարբեր կազմակերպական, ծրագրային, ենթակառուցվածքային և այլ խնդիրների հայտնաբերումը և մարզպետին համապատասխան առաջարկություն ներկայացնելը: Խորհրդի անդամներին հանձնարարվեց     համատեղ ուժերով կազմել   և խորհրդի նախագահի հաստատմանը ներկայացնել    տարեկան աշխատանքային ծրագիրը: Վերջինս     մարզպետի խոսքով   կյանքի կկոչվի    պետական աջակցության շնորհիվ: Ըստ կանոնադրության մարզպետին առընթեր երիտասարդական խորհրդի նիստը հրավիրում է խորհրդի նախագահը՝ յուրաքանչյուր երեք ամիսը մեկ անգամ: 

Օրակարգային հարցերից զատ մարզպետ Ռաֆիկ Գրիգորյանը պատասխանեց երիտասարդների կողմից առաջադրված հարցերին: