Գեղարքունիքի մարզպետի աշխատակազմ

ՀՀ Գեղարքունիքի մարզպետի 2014 թվականի հունվարի 30-ի որոշմամբ  2014 թվականի փետրվարի 4-8-ը Գավառի թիվ 1, Մարտունու թիվ 2, Սևանի թիվ 1, Վարդենիսի թիվ 2 և Ճամբարակի թիվ 1 հիմնական    դպրոցներում անցկացվեց դպրոցականների 2013-14 ուսումնական տարվա առարկայական օլիմպիադաների տարածքային փուլը: 16 առարկաներից իրենց գիտելիքները փորձեցին 2013 թվականի դեկտեմբեր ամսին տեղի ունեցած   օլիմպիադայի դպրոցական փուլում հաղթող ճանաչված աշակերտները: Տարածքային փուլում աչքի ընկած    աշակերտները, որոնք ներկայացնում են մարզի  մոտ 80 հանրակրթական դպրոցներ, մարզային հանձնաժողովի կողմից հնարավորություն ստացան մասնակցելու ս/թ փետրվարի 22-ից մարտի 11-ը անցկացվող դպրոցականների առարկայական օլիմպիադայի մարզային փուլին: Մաթեմատիկա առարկայից անցկացվող օլիմպիադային մասնակցում են    7-12-րդ դասարանների, իսկ մնացած 15 առարկաներից՝ 9-12-րդ դասարանների աշակերտները: Դպրոցականների առարկայական օլիմպիադայի մարզային հանձնաժողովի տվյալներով այս փուլում Գավառի տարածքից մասնակցում է 87 աշակերտ, Ճամբարակի տարածքից՝ 76, Վարդենիսի տարածքից՝ 46, Մարտունու տարածքից՝ 79 և Սևանի տարածքից՝ 54 աշակերտ: ՀՀ ԿԳ նախարարության կողմից սահմանած կարգի համաձայն մաթեմատիկա և ֆիզիկա առարկաների վերաբերյալ առաջադրանքները աշակերտը կատարում է  օն լայն տարբերակով և մասնակիցների անվանացանկը ներկայացվում է օլիմպիադայի հանրապետական հանձնաժողովի կողմից: Մարզային փուլում արդեն ամփոփվել են մաթեմատիկա, հայոց լեզու, հայ եկեղեցու պատմություն, հայոց պատմություն, քիմիա առարկաների արդյունքները: Հանձնաժողովի տվյալներով յուրաքանչյուր առարկայից 8 աշակերտ երաշխավորվել է մասնակցելու դպրոցականների 2013-14 ուսումնական տարվա առարկայական  օլիմպիադայի հանրապետական փուլին: Մինչև մարտի 11-ը   մարզային հանձնաժողովը կամփոփի  նաև   մնացած առարկաներից  գրանցված   արդյունքները: