Նորություններ
ԱՌԱՏ ՁՅՈՒՆԸ ԽԱԹԱՐԵԼ Է ԵՐԹԵՎԵԿՈՒԹՅԱՆ ԸՆԹԱՑՔԸ
12.12.2013
Դեկտեմբերի 11-ի օրվա երկրորդ կեսից սկսած՝ Գեղարքունիքի մարզում սկսվել են ձյան առատ տեղումները, որոնք շարունակվում են նաև դեկտեմբերի 12-ի ողջ օրվա ընթացքում: Գավառի տարածաշրջանում ձյան շերտի բարձրությունը այս պահի դրությամբ տեղ-տեղ հասնում է մինչև 1 մետրի: Մարտունու , Սևանի և Ճամբարակի տարածաշրջաններում՝ ավելի քան 50 սմ-ի, իսկ Վարդենիսի տարածաշրջանում՝ 25-30 սմ-ի: Ձնաբքի հետևանքով տեղ-տեղ անհնար է դարձել ճանապարհային երթևեկությունը և մարդկանց տեղաշարժը: Ձյան կապանքներում արգելափակվել են ավտոմեքենաներ, որոնց դուրս բերելու ուղղությամբ աշխատանքներ են իրականացնում մարզի ճանապարհաշինարարներն ու փրկարար ծառայության աշխատակիցները: Գեղարքունիքի մարզպետարանի աշխատակազմի տրանսպորտի և ճանապարհաշինության բաժնի տվյալներով անցած գիշերվա և դեկտեմբերի 12-ի ողջ օրվա ընթացքում մարզի ճանապարհ սպասարկող կազմակերպությունների տեխնիկական միջոցներն աշխատում են առաջին հերթին բաց պահել գլխավոր մայրուղիները ձյան և մերկասառույցի շերտից, սակայն դրանց անցանելիությունը լիարժեքորեն հնարավոր չի լինում ապահովել՝ շարունակվող առատ ձյան պատճառով: Չնայած իրականացվող աշխատանքներին՝ դեռևս փակ են մնում մարզի համայնքային և միջհամայնքային մի շարք ճանապարհներ: Սասատիկ ձնաբուքը խանգարում է նաև Սելիմի լեռնանցքի և Սոթք-Քարվաճառ ավտոճանապարհի բացման աշխատանքների ընթացքին: Հնարավոր խցանումներից կամ ճանապարհատրանսպորտային պատահարներից զերծ մնալու համար իրավիճակը վերահսկվում է մարզային ոստիկանության, ԱԻՎ մարզային փրկարար ծառայության և ճանապարհ սպասարկող կազմակերպությունների կողմից: