Գեղարքունիքի մարզպետի աշխատակազմ

ՀՀ ԱԺ նախագահ Հովիկ Աբրահամյանի հովանու ներքո նոյեմբերի 12-ին Մարտունի քաղաքում անցկացվեց դպրոցականների ասմունքի 7-րդ փառատոնի մարզային եզրափակիչ փուլը: Ասմունքի փառատոնին մասնակցեցին 11-14 եւ 15-17 տարիքային խմբերում ընդգրկված 37 դպրոցական, ովքեր ներկայացնում էին հանրակրթական երեք տասնյակից ավելի դպրոցներ: Ասմունքի հիմնական թեման այս տարի նվիրված էր Արցախյան շարժման 25-րդ տարեդարձին եւ կրում էր ՙԼեզու եւ հայրենիք՚ խորագիրը: Ասմունքի փառատոնի տարածքային փուլին Գեղարքունիքի մարզից մասնակցել են 128 հանրակրթական դպրոցների 1000-ից ավելի աշակերտներ, որոնցից մարզային փուլի մասնակցության իրավունք էին ձեռք բերել 37-ը: Իսկ փառատոնի հանրապետական փուլին մասնակցելու համար եզրափակիչ փուլում պետք է ընտրվեին 7 լավագույն ասմունքողներ: Ժյուրիի կազմում ընդգրկված էին նշանավոր դերասաններ Գուժ Մանուկյանը, Մարիետա Մակարյանը, Զավեն Աբրահամյանը, Գարիկ Չեպչյանը, բանաստեղծներ Ռազմիկ Դավոյանը եւ Շանթ Մկրտչյանը, գրականագետ Կարո Վարդանյանը, Գեղարքունիքի մարզպետարանի աշխատակազմի կրթության, մշակույթի եւ սպորտի վարչության պետ Գարիկ Բադալյանը: Փառատոնին մասնակցում էր եւ ողջույնի խոսքով հանդես եկավ Գեղարքունիքի մարզպետի տեղակալ Անդրանիկ Հակոբյանը:
Բեմից հնչեցին հայ դասական բանաստեղծների հայրենասիրական ստեղծագործություններ: Ժյուրին վերջում ամփոփեց եզրափակիչ փուլի արդյունքները: Ընտրվեցին այն 7 լավագույնները, ովքեր Գեղարքունիքը կներկայացնեն ասմունքի հանրապետական փառատոնում: