Գեղարքունիքի մարզպետի աշխատակազմ

Գավառի պետական համալսարանի բակում  դեկտեմբերի 22-ին  տեղի ունեցավ համալսարանի հիմնադիր ռեկտոր, փիլիսոփայության գիտությունների դոկտոր, պրոֆեսոր Հանրապետության վաստակավոր մանկավարժ Հրանտ Հակոբյանի կիսանդրու բացման արարողությունը, որը նվիրված էր նրա ծննդյան 85-ամյակին: Միջոցառմանը ներկա էին ՀՀ ԿԳ նախարար Արմեն Աշոտյանը, Գեղարքունիքի մարզպետ Ռաֆիկ Գրիգորյանը, փոխմարզպետ Անդրանիկ Հակոբյանը, բուհերի ռեկտորներ, դասախոսներ, մարզի համայնքների ղեկավարներ, հյուրեր տարբեր ոլորտներից:  Բացման արարողությանը    հաջորդեց հիշատակի  կարգը, որը մատուցվեց Գեղարքունյաց թեմի առաջնորդ Մարկոս Եպիսկոպոս Հովհաննիսյանի  ձեռամբ:  Կանգնեցված կիսանդրին  ինչպես նշեցին ելույթ ունեցողները հիշեցում է մարդկային առաքինության, մասնագիտական պատվախնդրության մասին:
 Արհեստավորի ընտանիքում ծնված Հրանտ Հակոբյանը    գերազանց առաջադիմությամբ  և մարդկային անգնահատելի արժանիքներով հանդերձ սովորել և ավարտել է  մայրաքաղաքի  մի շարք բուհերի բանասիրական,  պատմության, փիլիսոփայության ֆակուլտետները, պաշտպանել ատենախոսություն, եղել Երևանի պոլիտեխնիկական ինստիտուտի փիլիսոփայության ամբիոնի դասախոս, դոցենտ, ամբիոնի վարիչի տեղակալ: Իսկ 1985 թվականին ընտրվել ԵՊՀ աթեիզմի տեսության և պատմության միջբուհական ամբիոնի վարիչ՝ սիրված ու հարգված լինելով  բոլորի կողմից:   Հրանտ Հակոբյանի նախաձեռնությամբ և ակտիվ մասնակցությամբ Մայր բուհում սկսում են դասավանդել ,,Կրոնների պատմություն և տեսություն,, առարկան, ինչը բացառիկ խիզախ քայլ էր այդ տարիներին: Իսկ  որոշ ժամանակ անց այդ նորարարությունը տարածում է գտնում նաև մյուս բուհերում: Ունենալով սերտ կապեր իր ծննդավայրի հետ՝ 1993 թվականին  նրա  նախաձեռնությամբ   և  կառավարության որոշմամբ հիմնադրվեց  Գավառի պետական համալսարանը, իսկ Հրանտ Հակոբյանը  իր մանկավարժական և կազմակերպչական ողջ փորձ ու գիտելիքները ներդրեց  համալսարանի կայացման գործում:    Երկարամյա  արդյունավետ և բարեխիղժ աշխատանքի համար պրոֆեսոր Հակոբյանը արժանացել է բազմաթիվ պարգևների, պատվոգրերի և մեդալների: Հրանտ Հակոբյանի գիտամանկավարժական գործունեության միջազգային հավաստումն է նաև այն, որ նա Քեմբրիջի միջազգային կենսագրությունների կենտրոնի կողմից ճանաչվել է 21-րդ դարի նշանավոր մտավորականներից մեկը: Նրա ընկերներն ու հարազատները անսահման հուզմունքով են խոսում մանկավարժի  վաստակի մասին:   Հրանտ Հակոբյանը հեղինակ է մեկ տասնյակ մենագրությունների ու գրքերի, ավելի քան 100 գիտական ու հրապարակախոսական հոդվածների: Հոբելյանի  առթիվ Գավառի  փողոցներից մեկը այսօր  անվանակոչվեց Հրանտ Հակոբյանի անունով:  Միջոցառման մասնակիցները Գավառի համալսարանում  միջոցառման մասնակիցները դիտեցին  նաև Հրանտ հակոբյանի կյանքին և գործունեությանը նվիրված  ,, Հրանտ Հակոբյան՝ հավերժի  ճամփորդը,, ֆիլմը: