Տպել
Նորություններ
ԿԱՍԿԱԾՎՈՂ ՀԻՎԱՆԴՈՒԹՅԱՆ ԴԵՄ ՄԻՋՈՑԱՌՈՒՄՆԵՐԸ ՇԱՐՈՒՆԱԿՎՈՒՄ ԵՆ
07.11.2012
![](http://gegharkunik.mtad.am/files/n_pics/2288_s.jpg)
Գեղարքունիքի մարզի Վարդենիսի տարածաշրջանի Ծովակ գյուղում եւ նրան հարակից մի քանի համայնքներում շարունակվում են այս տարվա հոկտեմբերի երկրորդ կեսից նկատված սիբիրյան խոց հիվանդության դեմ պայքարի միջոցառումները: Իրավիճակն ընդհանուր առմամբ վերահսկելի է, հաշվի է առնվում յուրաքանչյուր մանրուք, մինչեւ վերջ ուսումնասիրվում են անասունների անկման դեպքերը, իրականացվում են կանխարգելիչ միջոցառումները: Գյուղնախարարության սննդի անվտանգության պետական ծառայության Գեղարքունիքի մարզային կենտրոնի պետը մեզ տեղեկացրեց, որ իրավիճակը գնում է դեպի կայունացում: Անասնագլխաքանակի վերջին անկումը Ծովակում գրանցվել է հոկտեմբերի 31-ին, Վանեւանում` նոյեմբերի 3-ին: Անասունների մսեղիքն ուղարկվել է լաբորատոր ուսումնասիրության, եւ առայժմ հստակ ախտորոշման պատասխան չի ստացվել: Փաստորեն, Ծովակում վեցերորդ, իսկ Վանեւանում երրորդ օրն է, ինչ վիճակը մնում է կայուն: Բոլոր հայտնաբերված կամ կասկածելի օջախները կրկնակի վարակազերծված են, անասնագլխաքանակը` կրկնակի պատվաստված, մսեղիքը` հատուկ անասնագերեզմանոցում ոչնչացված: Կարանտինը հանելուց առաջ կարվի եւս մեկ եզրափակիչ վարակազերծում: Սիբիրախտ հիվանդության նախանշաններով Մարտունու բժշկական կենտրոնում հոսպիտալացված բոլոր 36 հիվանդները դուրս են գրվել հոկտեմբերի 27-ի դրությամբ, դրանից հետո մարդկանց հիվանդության նոր դեպքեր չեն գրանցվել: Հոսպիտալացված հիվանդները հոկտեմբերի 30-ին կրկնակի բուժզննության են ենթարկվել, բոլորի մոտ առողջացում է դիտվել: Սննդամթերքի անվտանգության պետական ծառայության Գեղարքունիքի մարզային կենտրոնի պետի տվյալով` իրավիճակի կայունացումից 10-12 օր հետո կարանտինը կվերացվի: