Տպել
Նորություններ
ՃԱՄԲԱՐԱԿԻ ՏԱՐԱԾՔՈՒՄ ՏԵՂԱԴՐՎԵՑԻՆ ՀԻՇԱՏԱԿԻ ԽԱՉՔԱՐԵՐ
27.09.2012
Օրերս Ճամբարակ քաղաքի նորակառույց եկեղեցու բակում, Հայաստանյան մեծ երկրաշարժի զոհերին նվրված հուշակոթողի հարեւանությամբ բացվեց և օծվեց Ճամբարակի շրջանի, Հայաստանի եւ Արցախի սահմանները պաշտպանելիս զոհված 151 հայորդիների հիշատակը հավերժացնող խաչքար-հուշարձանը: Որի նախաձեռնությունը պատկանում է ՙԲարգավաճ Հայաստան՚ կուսակցության նախագահին: Ներկաները նորաբաց հուշարձանին ծաղիկներ եւ ծաղկեպսակներ դրեցին եւ խնկարկեցին Հայաստանի ու Արցախի ազատության համար զոհված հայորդիների հիշատակը: Ոգեկոչման արարողությունից հետո Ճամբարակի եկեղեցու բակում մատուցվեց Սուրբ պատարագ և բաժանվեց մատաղ: Մեր նորանկախ ու երիտասարդ պետությունը հաղթահարել է արտաքին ու ներքին շատ մարտահրավերներ ու դժվարություններ, իսկ այժմ կանգնած է նոր վերելքի ու զարգացման ճանապարհին, նշեցին ելույթ ունեցողները: Նույն օրը Շորժա գյուղում հանդիսավորությամբ բացվեց և օծվեց Արծվաշենի եւ Արցախի հերոսամարտերին նվիրված հուշակոթող: Քանդակագործության հեղինակ Սյոմիկ Մկրտչյանի աշխատանքը խորհրդանշում է հայ ժողովրդի հավերժությունը, խաղաղ գոյությունը և արարումը առ Աստված: Շորժա համայնքը գտել է իր զարգացման հիմնական ուղին եւ արձանագրել որոշակի ձեռքբերումներ: Դրա վառ վկայությունն է այս հուշակոթողի տեղադրումը, որն իրականացվել է Շորժայի գյուղապետարանի և համայնքի բնակչության նախաձեռնությամբ ու նրանց ֆինանսական միջոցներով: Արծվաշենից տեղահանված, Ադրբեջանի այլ վայրերից բռնագաղթված հայերով վերաբնակեցված այս գյուղում արտագաղթ չկա, արտագնա աշխատող մարդկանց կարելի է հաշվել մատերի վրա, իսկ տեղում մարդիկ իրենց համար գտել են կայուն աշխատատեղեր ու վաստակ: Գյուղում զարգացում է ապրում տուրիզմը, գյուղատնտեսությունը, կապիտալ շինարարությունը ու գլխավոր ենթակառուցվածքները: