Տպել
Նորություններ
ԴՈՒԴՈՒԿԻ ՓԱՌԱՏՈՆ ԳԱՎԱՌՈՒՄ
20.09.2012
Հայաստանում և Սփյուռքում ստեղծագործող վարպետ-դուդուկահարները Գավառում իրենց առաջին կատարումները հնչեցրին քաղաքի Սրբ. Աստվածածին եկեղեցում: Մեծ մաեստրո Հենրիկ Անասյանի և Մոսկվայի «Զվարթնոցե մշակութային հիմնադրամի նախագահ Անժելա Ստեփանյանի նախաձեռնությամբ դուդուկահարներ Մարտին Ղազարյանը և Գագիկ Գասպարյանը կատարեցին հոգևոր մեղեդիներ: Գտնվել հայրենիքում և այնտեղ ներկայացնել երկար տարիների ստեղծագործական աշխատանքը գերագույն հաճույք ու երազանքի իրականացում են համարում սփյուռքից Հայաստան ժամանած վարպետներից շատերը: Նրանք սեփական փորձով գիտեն, որ հայը համաշխարհային մշակութային ասպարեզում ներկայանալի ու ճանաչելի է դառնում հենց ծիրանափողի շնորհիվ: Դուդուկի մեղեդին խորհել է տալիս Հայաստան աշխարհի, նրա անցյալի, ներկայի ու ապագայի մասին: Բազմամարդ դահլիճում վարպետ դուդուկահարների կողքին իրենց կատարումներով հանդես եկան նաև Գավառի Գևորգ Դաբաղյանի անվան դուդուկի դպրոցի սաները: Դուդուկի անզուգական կատարումներն ընդմիջվում էին հայ երգի երիտասարդ վարպետ Գուրգեն Դաբաղյանի ելույթներով:Համերգն ավարտվեց դուդուկի մեծ վարպետ, ՀՀ վաստակավոր արտիստ,դուդուկի համահայկական փառատոնի գեղարվեստական ղեկավար Գևորգ Դաբաղյանի և դուդուկահարների անսամբլի համատեղ կատարմամբ: «Իմ Հայաստան,, փառատոնին ակտիվ մասնակցելու համար Գավառի դուդուկի դպրոցի սաները խրախուսվեցին ՀՀ սփյուռքի նախարարի պատվոգրերով: «Իմ Հայաստան,, համահայկական փառատոնի ծրագրի ղեկավարար Սամվել Հարոյանի կարծիքով դուդուկի փառատոն որպես այդպիսին կազմակերպվում է առաջին անգամ, սակայն հանրության կողմից ցուցաբերած մեծ հետաքրքրությունն ու սերը մեզ պարտավորեցնում է , որ այն դարձնենք շարունակական, տարեց տարի ընդլայնելով ու խորացնելով ծրագրի բովանդակությունը: