Նորություններ
ԳԵՂԱՐՔՈՒՆԻՔԻ ՄԱՐԶՈՒՄ ՃՇՏՎՈՒՄ ԵՆ ԿԱՐԿՏԱՀԱՐՈՒԹՅԱՆ ՊԱՏՃԱՌԱԾ ՎՆԱՍԻ ՉԱՓԵՐԸ
11.06.2012
![](http://gegharkunik.mtad.am/files/n_pics/1586_s.jpg)
ՀՀ Արտակարգ իրավիճակների նախարարության փրկարար ծառայության Գեղարքունիքի մարզային փրկարարական վարչության պետ Մարտին Բարսեղյանի հաղորդմամբ՝ արդեն ամփոփվել են անցած շաբաթ օրը Գեղարքունիքի մարզում տեղացած կարկտի պատճառած վնասների մոտավոր չափերը մի շարք համայնքներում: Հիմնականում կարկտահարությունից տուժել են Գավառ քաղաքը, Գանձակ, Սարուխան, Լանջաղբյուր, Նորաշեն, Կարմիրգյուղ, Ծովազարդ, Հայրավանք, Բերդկունք, Լճափ, Նորատուս, Ծափաթաղ, Փամբակ, Արեգունի, Դրախտիկ գյուղական համայնքները: Պատճառված վնասը հիմնականում գյուղատնտեսական ուղղվածություն ունի: Կարկուտն ամբողջությամբ վնասել է պտղատու այգիները, բազմամյա կերային մշակաբույսերի եւ աշնանացան ցորենի ցանքերը, բանջարբոստանային մշակաբույսերի սածիլները, խոտհարքերը, Լճափ գյուղում տաս մանր եւ երկու խոշոր եղջերավորների անկման պատճառ դարձել: Հեղեղումներից քանդվել են նաեւ գյուղամիջյան եւ դաշտամիջյան ճանապարհներ, փլվել հողաշեն պարիսպներ կամ շինություններ: Կորուստն անդառնալի կարելի է համարել պտղատու այգիներում, աշնանացան ցորենի եւ բանջարբոստանային մշակաբույսերի ցանքերում: Կարտոֆիլի վնասված ցանքերի վերականգնումը հնարավոր է, կաղամբի, լոլիկի ու պղպեղի, լոբու եւ այլ ընդավորների նոր սածիլումն ու ցանքը՝ նույնպես, բայց ահա աշնանացան ցորենի եւ պոլոր տեսակի պտուղների վերականգնումը՝ քիչ հնարավոր: