Գեղարքունիքի մարզպետի աշխատակազմ

 Այսօր Գավառի քաղաքապետարանի դահլիճում Գեղարքունիքի մարզի մեղվաբույծների հետ հանդիպում ունեցավ ՀՀ մեղվաբույծների միության նախագահ Ռոզա Ծառուկյանը:Հանդիպման նպատակն էր մասնագիտական խորհրդատվությամբ օգնել մարզի մեղվաբույծներին՝աշխատանքի վերսկսման ընթացքում ի հայտ եկած խնդիրները կարգավորելու համար: Սույն նպատակով մեղվաբույծների միության նախագահը ներկայացրեց մեր երկրում մեղվաբուծության ոլորտում վերջին տարիների ընթացքում գրանցված առաջընթացը, խոսեց մեղուների շրջանում ի հայտ եկած հիվանդությունների կանխարգելմանը միտված միջոցառումների իրականացման մասին: Անդրադառնալով այցի բուն նպատակին, Ռոզա Ծառուկյանը հանդիպման մասնակիցներին ներկայացրեց մեր երկրում մեղվաբուծության զարգացման համար ՀՀ կառավարության աջակցությամբ իրականացվող գործընթացի մասին: Ըստ Ծառուկյանի մեղվաբուծության ոլորտում բուժպրոֆիլակտիկ միջոցառումներ իրականացնելու համար ՀՀ կառավարությունը այս տարի տրամադրել է 10 մլն 300 հազար դրամ, որով ձեռք է բերվել բիբին դեղամիջոց,   մեղուների շրջանում վարատոզ հիվանդության կանխարգելման համար:Այն  անվճար հիմունքներով բաժանվում է հանրապետության 10 մարզերին՝ ըստ համայնքապետարաններից      մեղվաընտանիքներին վերաբերող ցուցակների:  Ըստ վիճակագրության հանրապետության մարզերի թվում ամենաշատ մեղվաընտանիքները գրանցված են Գեղարքունիքի մարզում՝ 40 հազար:    Մեղվաբույծների միությունը, ըստ միության նախագահի պատրաստ է մեղվաբույծների նույն սկզբունքով տրամադրել նաև մեղվաբուծության ընթացքում օգտագործվող գործիքներ: Ռոզա Ծառուկյանը նաև տեղեկացրեց, որ այս տարվա սեպտեմբերի 1-ից իր ղեկավարած միությունը երկամսյա վերապատրստման դասընթացներ է նախատեսում իրականացնել սկսնակ մեղվաբույծների համար: Հանդիպման ընթացքում քննարկում ծավալվեց նաև այս տարվա հունիսի 1-ից մեղվաընտանիքների վերահաշվարկի իրականացման,     հանրապետությունում արտադրվող մեղրի արտահանման, մեղվի տեղական մայրական կազմի ձեռքբերման և գործնական բնույթի այլ խնդիրների շուրջ: