Գեղարքունիքի մարզպետի աշխատակազմ

 Փետրվար ամսին տեղացած առատ ձյունն ու չընդհատվող ուժեղ ձնաբքերը գրեթե միշտ փակ վիճակում են պահել Սելիմի լեռնանցքը, ռազմավարական նշանակություն ունեցող ավտոճանապարհին    ստեղծելով բարդ ու անհաղթահարելի իրավիճակ: Սակայն վերջին մի քանի   օրերին, եղանակային պայմանների հարաբերական կայունությանը զուգընթաց ճանապարհն սպասարկող կազմակերպության աշխատակիցները լծվեցին   Սելիմի լեռնանցքի բացման   ոչ այնքան դյուրին աշխատանքներին :

  Սաստիկ ձնաբքերի հետևանքով ճանապարհի առանձին հատվածներում կուտակված ձյան շերտի բարձրությունը հասնում է մինչև 2 մետրի:     Մարտունի քաղաքից մինչև Սելիմի քարավանատուն` ձյան ծածկույթի տակ գտնվող   մոտ 18 կմ երկարությամբ ճանապարհի վրա   աշխատում է 4 միավոր տեխնիկա: Մեխանիզատորները աշխատանքի հետ կապված որևէ   խնդիր, բացի վերսկսվող ձնաբքերի վտանգից չեն տեսնում:

Ավելացնենք նաև, որ փետրվարի 21-ի ողջ օրվա ընթացքում եղանակային կայուն վիճակի շնորհիվ ճանապարհաշինարարները կարողացել են ձյան կապանքներից ազատել ճանապարհը: Ամենայն հավանականությամբ Սելիմն ամբողջովին բաց կլինի փետրվարի 22-ին: Իսկ թե որքան կպահպանվի այս վիճակը` կախված է միայն եղանակի քմահաճույքներից, քանզի Սելիմում    երբեմն ձնաբքեր են լինում նույնիսկ ապրիլ ամսին: Փետրվարի 21-ի դրությամբ երթևեկելի է նաև ՆերքինԳետաշեն-Մադինա- տեղական նշանակության ճանապարհը: