Գեղարքունիքի մարզպետի աշխատակազմ

Այսօր Գեղարքունիքի մարզպետ Նվեր Պողոսյանն ընդունեց հարավային Կովկասում ,,Տարածաշրջանային նախաձեռնություն հանուն երեխաների մասնակցությանՙՙ ազգային ծրագրի ղեկավար Աիդա Գևորգյանին և ծրագրի աշխատակիցներին: Ծրագրի ղեկավարը մարզպետի հետ զրուցեց դպրոցներում և խնամքի պետական հաստատություններում երեխաների տեսակետների, կարծիքների  անտեսված լինելու,   հասարակական մտածելակերպի թերզարգացվածության և նմանատիպ այլ խնդիրների շուրջ; Նա     միաժամանակ տեղեկացրեց, որ,,Տարածաշրջանային նախաձեռնություն հանուն երեխաների մասնակցությանՙՙ ազգային ծրագիրը նպատակ է հետապնդում նպաստել մարզում երեխաների կարողությունների զարգացմանը, որպեսզի նրանք առաջատար դեր խաղան իրենց և իրենց համայնքների զարգացման մեջ՝ տեղական, ազգային և տարածաշրջանային մակարդակներում իմաստավորված մասնակցության միջոցով: Գեղարքունիքի մարզում նմանատիպ ծրագիր նախատեսված է իրականացնել  երկու ամսվա ընթացքում,   Սևանի ավագ և թիվ 3 հիմնական դպրոցներում, 4 խմբերով:  Դասընթացներում կընդգրկվեն    14-18 տարեկան դպրոցականներ: Աշխատանքները կտարվեն հետևյալ ուղղություններով.

1.զարգացնել երեխաների գիտելիքներն ու հմտությունները երեխայի մասնակցության և նրա իրավունքի շուրջ

2.խթանել երեխաների մասնակցությունը երեխայի պաշտպանության ազգային և տարածաշրջանային ցանցերում

3.նպաստել երեխաների մասնակցությանն անմիջապես իրենց իրավունքներին և դրանց խախտումներին վերաբերող քաղաքականության առաջարկների մշակմանը:

Նվեր Պողոսյանը կարևոր համարեց դպրոցահասակների շրջանում նման դասընթացների  անցկացումը, ինչը  կնպաստի երեխաների ակտիվ մասնակցությանը իրենց վերաբերող խնդիրների լուծմանը: Մարզպետը  ծրագրի ղեկավարին առաջարկեց  դասընթացները կազմակերպելու ընթացքում միջդպրոցական կապ ստեղծել նաև մարզի մնացած դպրոցների հետ, քննարկվող թեմաներին հաղորդակից դարձնելով նաև այլ դպրոցականների,  անմասն չթողնելով հեռավոր և սահմանամերձ համայնքների դպրոցները: